دەچم بەرەو کەرت کردنی دوایین بەرماوی تاکژەنییەکی تر نە شەرمێک لەتۆ دەکەم و نە بەزەییشم بە چاوەکانم دادێ، زۆرە چاویلکە ... وەهمێک لە کچێنی قفڵێکی بە مەکری دەرپێ شۆری داقڵەشاو و تەنگاوییەک لە هێڵی نەفامینی خەونێکی بێ هیچ پۆزێکی مرۆڤایەتی خەساوێک ... دەیکەمەوە و دەیکەمەوە و دەیکەمەوە

            سەردەمی هەرزانییە ... بەشەر لێرە هەرزانە ... جەستەی رووت هەرزانتر ... ئابــڕوو نرخی لەتێک نان و درۆ لە هەموو شتێک هەرزان ترین ... چ داشکاندنێکی سووکە نرخی هەر ئنسانێک !!

.
.
.

         بۆ ئەوەی بوت پەرەست نەبێ تەنیا شکاندی بوتەکان بەس نیە، دەبێ خۆت بوت پەرەستی وەلانێی .

فرێدریش نیچە

               کاتێ لە بازنەی هاروهاجی وشەی دای، کۆڵانێک لە تەنیایی ترین ماچێکەوە دەمار بە دەماری تەمەنی لێوت داگیر دەکا ... کە دوور لە وشەی وشەیەکی تر هەجمینت لێهەڵدەگرێ بۆ دووبارە نووسینەوە ماچێکی تر .
ئەرێ بە شوێن سەربزێوی کام شامانای وشەوە بچێ، گەنجیم ؟

 شەوی یەڵدا بوو ئەوشەوەی بارانیش دەباری و دەنگی حەزرەتی نالیش ئەهات و تۆش بێ سەر و شوێن لە ناو شارە وەهمی دڵمدا خۆت ئەدۆزیەوە و من ... کچێ 2010 ش هات و ماچێکت هەر نەدامێ . جا تو خودا ئەوە دینە ؟

         بەڵام پاییز و 09 و هەنار و ئاوس بە تەنیایی و تاکژەنی هەر بەردەامە . رەنگە لە کۆتاییەکانی وەهمێکدا لە کەلاوەیەکی پیرۆزی لاشە هیوایەکدا، بتدۆزمەوە خاتوون .  ئەگەر دەرفەتێک بمێنێ بۆ ماچ .

هاوڕێم تەمەن بەرەو دوور بوونەوەی بزەیەکی ترمان ئەبا ... ئێرە وڵاتی مەرگی زەدەخەنەیە .

 نە کەس لە هێوریی ماچێ تێدەگا و نە کەسیش ورە هەنسکی دڵتەنگییەک ئەلاوێنێتەوە ،

 دڵم تەنگە بۆت هاو‌ڕێم سروە خان .

كچه‌ خوێندكارێكی ده‌ستبه‌سه‌ركراوی‌ كورد ئه‌شكه‌نجه‌ كراوه‌‌

05-10-1388 كوردستان میدیا: پاش 34 رۆژ بێ‌سه‌رو شوێنبوون رۆژی‌ یه‌كشه‌ممه‌، 29/9/88ی هه‌تاوی، بنه‌ماڵه‌ی كچه‌ خوێندكاری ده‌ستبه‌سه‌ركراوی كورد، سروه‌ وه‌یسی، ته‌مه‌ن 22 ساڵان، ناسراو به‌ "هه‌نیسك مه‌ریوانی"، خوێندكاری زانكۆی ئه‌لزه‌هرای تاران له‌ به‌ندیخانه‌ی ئێڤینی تاراندا بۆ ماوه‌یه‌كی كورت چاویان به‌ كچه‌كه‌یان كه‌وت. هه‌واڵده‌ری‌ كوردستان له‌م پێوه‌ندییه‌دا رایگه‌یاند، ناوبراو به‌ گوته‌ی بنه‌ماڵه‌كه‌ی له‌ بواری رۆحییه‌وه‌ وره‌به‌رز بووه‌ به‌ڵام له‌ بوار جه‌سته‌یی‌یه‌وه‌ زۆر لاواز‌و شوێن‌و نیشانه‌ی ئه‌شكه‌نجه‌ به‌ جه‌سته‌و سیمایه‌وه‌ دیار بووه‌و ئه‌و جۆره‌وی كه‌ بنه‌ماڵه‌كه‌ی له‌و چاوپێكه‌وتنه‌ كورته‌دا تێگه‌یشتوون، سروه‌ رووبه‌ڕووی گوشارێكی له‌ڕاده‌به‌ده‌ره‌و ده‌یانه‌وێ‌ ناچار به‌ دانپێدانان دژ به‌ خۆی بكه‌ن‌و كۆمه‌ڵێك تۆمه‌تی بێ‌بنه‌مای له‌سه‌ر راست بكه‌نه‌وه‌.

       هەموو مانایەک لە درکانەوە سەرچاوە دەگرێ، ژوانیش لەم یاسایە بەدەر نیە و لارێی لاوێتیش ئەگرێتەوە و نازی باران و ڕەشبەڵەکی خیزەڵانی کانی خاک زاواش، تەڕ . سەرەتا دڵێک تەنگ بوو، درکانی هەژاند، غەریبی زاوای زام لە لایەک و بوکێکی نەزۆک، کۆ رازێک ترەکی و  بوون بە هەوێنی گرێبەستی نەدرکاوترین هاواری ئەم ساتە وەختانەی تەمەن . درکانیش وشەی وەگەڕخست . ڕێژنەی دڵاوی دوو مرۆڤ لە رەگەزی مان بۆ هەندێ چەمک، ڕەنگە گەبچاڕی دەسفرۆشێکی ناز بێت لە مەحشەری یەزدانێکدا . لەوانەشە دەسگەڕی مامە حازییەکی وەرەس و دایە سەعادەتی هەر لە خۆرا چاوەڕوان یان کەرەسەی خۆ گەورە نیشان‌دانی مناڵانی کەلاوەی پشت ماڵانی شارە وەهمێک . ئیتر بە شێوەیەکی گشتی ئەوەیە بیانووی مانەوەی ئەم دوو کەسە لە دنیا پان و بەرینەدا . چاک یان خرابیش، بە توون .

        پێش زاوزێی پیتەکان هەندێ وشەی شەل و گێڕمان خانەخوێ بوو بەڵام سنووری هیچ دەڤەرێکی نووسین پێناسەی نەکرد بوون . وێڵ و سەرگەردان لەو دیوی باوەشێکەوە، ماچیش . یانی هەر یەکەو لە خۆیانەوەو خۆیانەوە . وەکوو ئەو شەوە . یەکەم ژوان لە ژێر بنەمای توونێتیەوە خوڵقا، تینوو لە دوو جلی مانا دا، رەگاژۆی هاوئامێزییەک رەنگە . باران نازەنینە یانی نازێنە و نازێن، یاری . لەنجە و لاریشی هەیە ، خیزەڵانیش نوقمی تامی تەڕ بوون و بە سەرا بارین . کەچی لە ناو زەریادا بەڵام ویشک لە هەر تەڕاییەک . خیزەڵان بەردەم تینوویەتی و شوناسی موتڵەقی هیچ ئاوێکیش تەڕی ناکا و دژە ئاویش نیە . خیزەڵان چاوگەرێکی بێ هاوتایە، سیپ چیش بەڵام بەو ژوورەی دیکەدا . ئەو ژووەی تەنای پەنجەرەی هەیە و چوار دیوار و هیچ . خیزەڵان سێهەم کەسی تاکە لە جێناوەکاندا . بارانیش تینوو تر لە تەڕایی خۆی و هەور و ئاسمانیشی . بارانیش یەکەم کەسی تاکە لە ناوەکاندا، یەکەم وەکوو ئەو . منێتی و خۆیەتی تێکقرماون وەکوو ئەو . باران لێرەش ئەبارێ بەڵام نەک بارینی سەرەوخواری پۆلی پێنجی سەرەتایی .

        ویزەویزی زەردەواڵەکان ئیتر نایان شڵەژێنێ، وەکوو جاران . بایەکە و دێت و ناڕوا یانی دەڕوێ لە فشەخانەی شەقامییەکدا . بەڵام ناز بەردەامە . رایاندەچڵەکێنێ بەڵام باران و خیزەڵان باوەڕیان هێناوە بە زەردەواڵە بوونی زەردەواڵە . 

         شەقشەقەیـــــــــــــــــــــــــــــــــــــــــــــــــــــــــــــــە، یەک لەناخەوە و ئەویتر لە روخسارەوە . ناخ مەمکیش دەگرێتەوە و روخساریش هەنار . ئیتر ئاوایە . خیزەڵان ئەڵێ : دووپات بوونەوە لە شێوەی خۆیدا باشە . بۆ وێنە من حەز دەکەم بەردەوام بباری بە بە سەرمدا و دووپات ببیەوە لە باوەشمدا . بارانیش بە زەردەخەنەوە وڵامی ئەداتەوە و ئەڵێ : خیزەڵانی پیرەمێرد دڵم تەنگتر مەکە بە قوربان - بە بارانە سوێراوی چاوە تەماوییەکەم تینوویەتیت ئەشكێ ؟ ئەماتە ... ئەمە چاو و ئەمەش ویشکەساڵی گەرووت . دا ئەبارێم بە سەرتا، هێدی ... هێدی ... .

شەوی یەڵدا

شەوی یەڵدایه یا دەیجــــــــووره ئەمشـــــەو
که دیدەم دوور له تۆ بێنـــــووره ئەمشەو ؟!
دڵم وەک حاکمـــــی مـــــــەعزووله قوربان !
خەڵاتی وەسڵی تۆی مەنـــــزووره ئەمشەو
دڵیش مایل به دیــــــــــــــــــدەی تۆیه، بۆیه
له من وەحشی و ڕەمیـده و دووره ئەمشەو
که تۆی شای کەچکولاهی دیــده مەستان،
چ باکم قەیسەر و فەخفــــــووره ئەمشەو ؟!
له خەو هەڵساوه یا ئاڵـــــــــــــــۆزه چاوت ؟
هەمیشه وایه یا مەخــــــــمووره ئەمشەو ؟
سوروشکم نەقشی چاوی تۆ دەکێشــــێ
که جێم سەردارەکەی (مەنسوور)ه ئەمشەو
موسوڵمانان دهپرسن حاڵی « نالـــــــــی »
له کونجی بێکەســی مەهجووره ئەمشەو

حەزرەتەکەی نالی

 بە تێکەڵاوی خاک و شەرماوی پێڵاوی رێبوارێکی شێت قەسەم، لە دنیا دا کەس لە کەس تێناگا، رەنگە زۆر بە دوای راستییەکاندا بگەرێن لە بیر و  بۆچوونی ئەوانی تردا بەڵام لە کۆتایی‌دا راستی تەنیا ئەوەیە - خۆمان پێمان وایە کە وایە -  کەواتە بۆ هەوڵ بدەین بۆ تێگەیاندی کەسی بەانبەر .

 بەڵام

 ( مەنفی ) لە ( مەنفی ) دەکاتە ( شتە خۆشەکە ) .

کێ دەزانێ ئەو پەڕی تەنیایی بە کوێ دەگا ؟
ئەی دڵە تەنگەکەی وشە بێنازەکانی هۆنراوەیەک چۆن پێناسەی تەنیایی دەکەن ؟
کام پرسیار وڵامی گەرەکەو کام وڵام پرسیاری بۆ دیاری بکرێ ؟
ئەرێ ئەوەش هەست بە ویزە ویزی هەر لە خۆرا پیرۆزی ئەندێشە دەکەن ؟

...

مەگەر وشە سەرمەستەکانی غەزەلێک بزانێ تامی چاوەروانی حەزرەتەکەی نالی چۆن دەبێ
وردە نازێکی حەبیبەخان ... دە تۆش هەر ماچێکمان مەدەیە خاتوون .

ماچێک لە نێوان سێحری تەمەنێکدا و چاوەرەوانی نەدرکاوێک لە مانی پیر بوونی
خۆشەویستی و
چەند هەزار وشەی تێپەر و تێنەپەر لە رستەی خۆشم دەوێی ...

       شەوێک، کەمێک ئەوبەرتری بێدەنگی تەنیا تاریکە بزەیەک، ماچێک لە کوڵمی ئاڵی بێکەسی بارین، بیانووی نەخەوتنمە . هەر لە رێژەی بارنەوە تا دوا برسکی بەفری چاو چنۆکی بە جێماوی گۆنای پیرە دارێکی هیچ تەمەن، ژیان .

دوو هێڵی تەریب چ تێدەگەن لە پێگەیشتنی تیژە تیشکی نیگای بەستەزمانی من و باوەشی هەوتیو کوژی تۆ ؟

    چ گێژاوێکی قوڵ و مەندە خواستەکانی رێبوارێکی چاوەڕوان و عیشوەی شەوێکی بێ ئاگا و ترەکانی پشیلەیەکی عاشق، میاو ... میاو ...

     تۆ بەردەوام بە لە نووسین و من و نهێنییەکانی نێژراوی پێریۆد بوونی پەرییەکەی خودایی ئەو شەوەمان بەردەام خوێنەرتین . بەردەنگی پێدار تا بەکەی خاتوونەکەم ؟ دەنگێ ... سرتەیێ ... سەرمامە ...

....

     بەستەڵۆکی نەتکاوییە پێدەشتی دڵی هەژاوی رێبوارێک، قاقا بەم ژیانە پێدەکەنێ و هیچ دەنگێکیش ناگاتە خودا . خەساوی تەمەنە، ناڵە ناڵی ئەم ساتانە .

بێز لە فرە مانایی ساویلکە بوونی شێتێکی لە هەزار کون مارگەستووی گرینۆک، چ فۆرمێکی شرۆڤەی هەڵنج دەخوازێ ؟

بارانیش تەڕی کردم و وشت لە نامەی ویسال و سەڵت لە هێمنایەتی ئەو شەوانەی دڵداریمان . باران نە فرمێسک بوو نە مانایەکی تری هۆنراوە ، باران چەپۆکاوی تر بوو لە بەردە بێ حەیاکانی لەشی دۆعا .

لە بن دارێک کە هیچ تێناگە لە ژوانی من و بیرەوەرییەکانی نازدار حەیران تا بەیان هەڵ لەرزین ، ئەوە رووی راستەقینەی پاییزی ئەم دیارە .

لە پاش ئەو شەانە ، لەوانەیە ماچێک لە کوڵمی دڵ تەنگیش داواکاری گیرسانی جگەرەش لە جێی خۆی .

....

    ئیتر چاەوکانیشم هاوڕێیەتی ئەم سەفەرەم ناکەن چ بگا بە هیوایەکی ساویلکانەی
رێبوارێک .
تۆ بۆ کوێ ئاوا بە پەلە خاتوون ؟ شەو کە هات دانیشە و تێر تێر سەیری پشیلەکە
بکە، لە وانەیە، هۆنراوەیەکی تر

سەر بە ملی رێگاوە تا پیاسەیەکی تر لە کۆڵانەکانی وەهم‌دا و لە ژیانێکی پر چاوەروانی و لە لە خۆرای لاوێتیمەوە ...

ئیتر دەگەمە کوێ، بە جێی خۆی ... کات کاتی رۆشتنە دیسان و کۆمەڵێ هەنگاوی تر ...

کە دەبێ ئاوا بێ و هەر لەو مانایەدا ... .

 ئیتر مەودایەک تا 09یەکی تر و هەر لە تامی ماچێکی سەڵت و خەساو ...

      باسی دۆڕانی ماچی مەمەی خاتوونێک بە جێ خۆی، بەڵام کە باس لە دە هەزار ماچی مەمک  دێتە گۆڕێ رەنگە وشەکانیش زەوقی بن چ‌بگا بە کۆڵانگەڕێکی بێ‌ کەس و بێ پەنای وەک من و هەزارن لاشە رووتی تەنگاوی نیشتمانە کۆست کەوتووەکەی جەنابی بیرەوەری . ئیتر کە ئەو گرەوە بەرەو هێکتارێک ماچی مەمک کۆتایی بێ  رەنگە ئەوە دوا ئاواتی حەزرەتی نالیشی تیا بەدی بکرێ ... ئەویش بەو مانایە کە نە حەبیبەیەک رازی دەبێ و نە قەراریشە رازی بوونی حەبیبە خان دەنگۆی و دژە دەنگۆی ئەو باسە بێ . یانی دەهەزار ماچە مەمک بێ مەکر و نازی حەبیبە خان .  یانی کۆماچێک لە مانی بردنەوە گرەوەیێکی شێتانە و بەفرینیش .

         ئەگەر باسەکە بێنینە سەر جۆری ماچ کردنی مەمکی بەفرین ئاوا دەست پێدەکەم . سەرەتا تێرامانێک بە پانتای 09 و بەرەو رۆچوونی 25 ساڵی و حەسرەتی هەموو مشتەچییەکانی رۆژەهەڵاتی ناوەراست و ژێستێکی ماقوڵانە کە وا نیشان بدا هیچ نەقەوماوە و دنیا ئەم و ئەمانە . ئیتر ئەوەش خۆی لێزانینێکی دەوێ کە پاش چەند ساڵ تاکژەنی و بە سەر داهاتنی کەسێک و باسی کردنی لە نێو کۆڕ و کۆبوونەوەکان دا بە دەست دێ ... ئەرێ هەر راست ئەو کاتەی تۆ و من و ئەو و هەموومان سەرمان لە دەلەقێنین و دێڵین ئەی لەو گەمژانە جا تو خودا ئەوە دینە و خۆشمان هەر لەو کاتەدا بیر لە مەمە خان دەیکەینەوە و بەفریش لە سینگ و بەرۆکی کورێکی تر . ئا ئا ئا هەر بەو ئەدەبیاتەوە و بەو رامانەوە .

         کۆمەڵێک پرسیار دێتە گۆرێ و ئێمەش یانی حەزرەتەکەی نالی و حەبیبەخان و نۆبەرە و باشەپەرەکانی هەر لە شێوەی تامەزرۆیی و دڵەراوکێ بۆ دەربازبوونی ئەو جارەی تاکژەنی و کەمێکیش هیوا بۆ ئۆرگاسمی دوولایەنە و بێ دەستەڵات بوونی دەستەکانمان لەو دیوەی تەنیایەوە . پرسیارەکان لە فۆرمی ماقوڵ بوونەوە دەست پێدەکەن و هەر یەک سەر دوای چارەگێک بە هینەکە ، ئەو شتە ، ماڵتە وانێک ، کۆتایی دێ ... دوایش بێ ئەوەی خۆمان تێک بدەین ... وەکوو گوڵی ژاکاو لارە لارێک دەکەین و دەگرێینەوە هەر بەزمەکەی خۆمان یانی مێژوویەک لە درۆ و ریا و من لەو کەسانە نیم .

با 09ی ئەو جارە هەر وەک بەفرین کوتەنی 3 پرایار بێ :

کە باس لە یاسای داوێن پاکی و داوێن پیسی پەپوولەیەک دەکرێ ئەوە کێیە بۆ دژ کردەوە لە ماچێک بوگزەرێ کە من لە هەر دە هەزارەکەی بوگزەرێم ؟

ئێرە لە کام وشەی سەرمەست و شێت و بەرەڵڵاوە پێ دەگرێ کە من و تۆ و ئەوانی تر ئاوا بە سانایی فێری نازە درۆ بووین و نازە درۆ کێ دەزانێ یانی چی ؟

ئێرە من ماچەکانم کرد یان نا ؟

        کاتژمێر، چرکە ساتی دوا نازی هەتاوێکی لەرزۆک و نەزۆکی رۆژێکی سەڵت . ئێرە بڵێسەی رەنگ پەڕیوی ژیلەمۆی تەمەنی کچێکە و سووراو سپیاویش، پرسیارگەلێکی سەرگەردان و پنجە ڕدێنی پێستی ساف و لووسی کیژۆڵەیەک بە ناوی دیلی خان . هەنگاوێکی تر بەرەو ژوورە لێکدراوێکی پڕ لە بۆنی خەمۆکی و داپۆشێنەرانی سووتیەنێکی بابەردەڵە و شۆرتێکیش لە رەنگی خوێناوی ویشک بووی چەند دڵۆپە مۆمی داگیرساوی تین و گوڕی باڵغ بوون و تتتتتت تاکژەنی .

تەمەن هەڵگری کام شاراوەیی دڵتەنگیە خاتوون ؟

         رەش رەش ئەنوێنێ ئاسمانی شین داگەڕاوی جەماوەری لە خۆرا خۆش و شەو . لەشێکی نیوە رووت و لێوێک پڕ لە بێ ماچی و جوتێ مەمکی لێو نەدیوی ئەو دیوی تەنیایی . نێوک لێرەش هەر سەربەخۆیەکی منداڵانە و وەبیر وەهمی لایەلایە دینێتەوە و مقەست و دایک و مامانێکی دەست و پەنجە پڕ لە ژیان . ئەوانی تریش لە بیر کراوێکی پڕاوپڕ لە سەرسوڕماویی ئاڵەکۆکی گەورە بوون . بەرەو 11 و 12 ئەڕوا و تەنانەت لە 09شی لە داوە مێلۆدی کاتژمێرێکی هیچ وپووچی حیساب بۆ نەکراوی لە کونێک پەسیوی بێ کەڵکی هەتا سبەینێ ئێوارە خوێری . بەرەو سەرەتای رۆژێکی سەرشێتی تر ئەڕوا تەمەنێکی سەر لێشێواوی تا ئەژنۆ لە چارەنووس چەقیوی سەر لە سەر،سەر .

کچێ دەهەستە ئەوە نوێژی نیوەرۆیە ...

تاساو هەڵدەستی ، هەموو ژیان خەونێکە بە 09 مانەوە . بە پرتە پرت و نارە نار لە بەر خۆتەوە دووپاتیان دەکەیەوە .

یەک : سیفر

دوو : یەک

سێ : 4، باکوور باشوور رۆژهەڵات ... یەک وڵات و یەک خەبات .

چوار : پێرەمێردە گۆچان بە دەستەکە چی بەو پیرێژنە شین پۆشە کوت ؟

پێنج : مەملی مەمانی مەمۆ هی خۆمە و نەیدەم بە تۆ ...

شەش : شڵپێک ئاو بە دموچاوت دادەکەی و بێئەوەی تەنانەت بیر لەوە بکەیەوە، قامکەکانی دەستی مرۆڤێک بۆ دەبێ وەک یەک نەچن ؟

حەوت : هەی گوو بەو چارەنووسە کە بەردەوام لە 7 دا دووپات دەبێتەوە و ئەویش .

هەشت : باوەر بە  سیفر بوونی یەک ناکەی و دووش هەر ئێوەن، خۆت و ئەو و سێش هەر چوار پارچەی نیشتمانە و شیرەکەشت دەرێژرێ و ماچ و لە خەویش رادەپەڕی و حەوتیش دەبێتەوە 09 و ... .

.........

تێبینی : خەونە ئیتر ... وەڵڵا .

سەرچاوە :

هەتا نێڵەی نەیە ئاورگی دڵ ، چەم پڕ لە نەم نابێ

هەتا نەم دا نەبارێ تینی ئەم ئاورگە کەم نابێ

لە ناو ئاورینگ و ئاونگا شەم رادەبرێ بێ هەمدەم

بەڵێ شەوگاری تەنیایی بە بێ فرمێسک و خەم نابێ

... مامە هێمن ...

جگەرەیەک دادەگیرسێنم ... چاو شووشەی چاویلکەکانم دەکەم ... پیرتر بووم بەڵام ئەوجاریش نەمردم ...

هە ... هە ...

 وا بزانم  ئەویش بە هەڵە تێگەیی ... چ ژیانێکە ... خواست بۆ مانەوە لە سەرەوەی خواست بۆ ماچە ...

دیسان رۆژ بۆوە و هەر خەوم لێناکەوێ ... بە بێ خەویش خەون دەبینم ... ماچێکم دەدەیەی خاتوون ؟